LYA00003 - Ang Mga Lihim Sa Torre Ng Sinagtala

Nang maghasik yata ng kamalasan sa mundo, sinalo lahat ni Jhustin. Una, naiinis siya sa ligaw na titik “H” sa kanyang pangalan. Pangalawa, lagi siyang inaasar ng kanyang kapatid at mga kaklase dahil dito. Pangatlo, hindi naman niya masisi ang ama na nagbigay sa kanya ng kakatwang pangalan dahil matagal na itong pumanaw. Ang hindi alam ni Jhustin, ang kakaiba niyang pangalan ang maghahatid sa kanya ng kakaiba ring suwerte. Sa paborito niyang computer shop kung saan siya laging naglalaro ng online games, may makikilala siyang tao na may ligaw na titik “H” din sa pangalan. Ang taong ito ang magbibigay ng bagong saysay at kabuluhan sa kanyang buhay sa munti nilang bayan. Magiging masaya at lalong makulay ang bawat araw ni Jhustin dahil sa bago niyang kaibigan. Mamumulat siya sa mga bagay na ni minsan ay hindi niya inakalang posible palang maranasan ng isang kabataang tulad niya. Malalantad sa kanya ang katotohanang matagal na niyang ikinukubli sa isang sulok ng kanyang puso. Ngunit lingid sa kanyang kaalaman, ang bago niyang kaibigan ay may itinatago palang lihim. Isang lihim na maaaring sumira sa lahat ng magagandang danas at makapagdala ng higit pang kamalasan sa kanyang buhay. Handa na kaya si Jhustin sa lihim na kanyang matutuklasan?